ക്രിഷ് 4 പ്രതിസന്ധിയിൽ: 500 കോടി വേണമെന്ന് ഹൃതിക്, 350 കോടിയിൽ ഉറച്ച് നിർമ്മാതാവ്

ക്രിഷ് 4 പ്രതിസന്ധിയിൽ . ഇന്ത്യൻ സിനിമയിലെ ഏറ്റവും വലിയ സൂപ്പർഹീറോ ഫ്രാഞ്ചൈസികളിലൊന്നായ ക്രിഷ് 4 വലിയ സാമ്പത്തിക പ്രതിസന്ധി നേരിടുന്നതായി റിപ്പോർട്ടുകൾ വ്യക്തമാക്കുന്നു. നടനും ചിത്രത്തിന്റെ സംവിധായകനുമായ ഹൃതിക് റോഷനും നിർമ്മാതാവ് ആദിത്യ ചോപ്രയും തമ്മിൽ ബജറ്റിനെച്ചൊല്ലിയുള്ള കടുത്ത ഭിന്നതയാണ് ഇതിന് കാരണം. ഹോളിവുഡ് സൂപ്പർഹീറോ ചിത്രങ്ങളോട് കിടപിടിക്കുന്ന വിഷ്വൽ എഫക്ട്‌സുകളും ആക്ഷൻ രംഗങ്ങളും ഉറപ്പാക്കാൻ ചിത്രത്തിന് കുറഞ്ഞത് 500 കോടി രൂപയെങ്കിലും ബജറ്റ് വേണമെന്ന് ഹൃതിക് റോഷൻ ആവശ്യപ്പെടുന്നു. എന്നാൽ, നിലവിലെ സാഹചര്യത്തിൽ ഒരു സിനിമയ്ക്കായി ഇത്ര വലിയ തുക മുടക്കുന്നത് വലിയ സാമ്പത്തിക റിസ്ക് ആണെന്നും പരമാവധി 350 കോടി രൂപ മാത്രമേ നൽകാൻ കഴിയൂ എന്നും യഷ് രാജ് ഫിലിംസ് മേധാവി ആദിത്യ ചോപ്ര നിലപാടെടുത്തതോടെ ചിത്രം താൽക്കാലികമായി മാറ്റിവെച്ചിരിക്കുകയാണ്.

ബജറ്റ് പരിധി വിടുന്നത് സിനിമയുടെ ലാഭക്ഷമതയെ ബാധിക്കുമെന്ന നിർമ്മാതാവിന്റെ വാദവും വിട്ടുവീഴ്ചയില്ലാത്ത ഗുണനിലവാരം വേണമെന്ന നടന്റെ ആവശ്യവും തമ്മിൽ ചേരാതെ വന്നതോടെ നിരവധി ചർച്ചകൾ പരാജയപ്പെട്ടു. ഇതോടെ സിനിമയുടെ ചിത്രീകരണം അനിശ്ചിതത്വത്തിലാവുകയും ഹൃതിക് റോഷൻ മറ്റു സിനിമകളിലേക്ക് ശ്രദ്ധ തിരിക്കുകയും ചെയ്തു. 2026-ൽ ആരംഭിക്കാനിരുന്ന ചിത്രീകരണം ഇതോടെ 2027-ലേക്ക് നീളാനാണ് സാധ്യത. നിലവിലെ റിപ്പോർട്ടുകൾ പ്രകാരം ബജറ്റ് കുറച്ച് തിരക്കഥ മാറ്റുന്നതിനെക്കുറിച്ചോ അതല്ലെങ്കിൽ ഹൃതിക്കിന്റെ ആവശ്യം അംഗീകരിക്കുന്ന പുതിയ നിർമ്മാതാക്കളെ കണ്ടെത്തുന്നതിനെക്കുറിച്ചോ ഉള്ള ആലോചനകൾ നടക്കുന്നുണ്ട്. എങ്കിലും പ്രിയങ്ക ചോപ്ര ഉൾപ്പെടെയുള്ള താരങ്ങൾ ചിത്രത്തിന്റെ ഭാഗമാകുമെന്ന് സൂചനകളുള്ളതിനാൽ വലിയ പ്രതീക്ഷയിലാണ് ആരാധകർ.

LAST ARTICLE

കൊല്ലം കോട്ട കമ്പനിയുമായി ടിനു പാപ്പച്ചൻ ഫസ്റ്റ് ലുക്ക്‌ പുറത്ത്…