സൂപ്പർസ്റ്റാർ രജനീകാന്തിനെ നായകനാക്കി നെൽസൺ ദിലീപ് കുമാർ സംവിധാനം ചെയ്യുന്ന ‘ജയിലർ 2’-ന്റെ പ്രൊമോ വീഡിയോ പുറത്തിറങ്ങിയതോടെ സോഷ്യൽ മീഡിയയിൽ വലിയ ചർച്ചകളാണ് നടക്കുന്നത്. രജനീകാന്തിന്റെ മാസ് എൻട്രിക്കൊപ്പം പ്രേക്ഷകരുടെ ശ്രദ്ധ പിടിച്ചുപറ്റിയത് പ്രൊമോയിൽ ഇടം നേടിയ മലയാളി താരങ്ങളുടെ ശക്തമായ സാന്നിധ്യമാണ്.
ആദ്യ ഭാഗത്തിൽ ‘വർമൻ’ എന്ന വില്ലൻ കഥാപാത്രമായി തകർപ്പൻ പ്രകടനം കാഴ്ചവെച്ച വിനായകൻ രണ്ടാം ഭാഗത്തിലും നിർണായക വേഷത്തിൽ എത്തുമെന്ന സൂചനയാണ് പ്രൊമോ നൽകുന്നത്. അദ്ദേഹത്തിന്റെ സ്റ്റൈലിഷ് ലുക്കും തീക്ഷ്ണമായ നോട്ടവും ഇതിനോടകം തന്നെ ആരാധകർ ഏറ്റെടുത്തുകഴിഞ്ഞു.
അതേസമയം, സുരാജ് വെഞ്ഞാറമൂട്, കോട്ടയം നസീർ, ഹക്കീം ഷാജഹാൻ എന്നിവരുടെ സാന്നിധ്യവും പ്രൊമോയിലെ പ്രധാന ആകർഷണമായി മാറിയിരിക്കുകയാണ്. മലയാള സിനിമയിലെ ഈ പ്രമുഖ താരങ്ങൾ ഒന്നിക്കുന്നതോടെ ‘ജയിലർ 2’-ൽ മലയാളത്തിന്റെ ശക്തമായ സാന്നിധ്യമുണ്ടാകുമെന്ന പ്രതീക്ഷയാണ് സിനിമാപ്രേമികൾ പങ്കുവയ്ക്കുന്നത്.
2023-ൽ പുറത്തിറങ്ങിയ ‘ജയിലർ’ വമ്പൻ ബോക്സ് ഓഫീസ് വിജയമായിരുന്നു. അതിന്റെ രണ്ടാം ഭാഗമായ ‘ജയിലർ 2’ കൂടുതൽ വലിയ കാൻവാസിലും അതിശയിപ്പിക്കുന്ന ആക്ഷൻ രംഗങ്ങളുമായാണ് ഒരുങ്ങുന്നതെന്നാണ് റിപ്പോർട്ടുകൾ. അനിരുദ്ധ് രവിചന്ദറിന്റെ സംഗീതവും നെൽസൺ ദിലീപ് കുമാറിന്റെ മാസ് മേക്കിംഗും വീണ്ടും ഒന്നിക്കുന്നതും ചിത്രത്തിന്റെ ഹൈലൈറ്റായിരിക്കും.