കുഞ്ചാക്കോ ബോബൻ നായകനാകുന്ന പുതിയ ചിത്രം ’40 ഡെയ്സ് ഓഫ് ഹൗസ് പാർട്ടി’ (40 Days of House Party)-യുടെ സെക്കൻഡ് ലുക്ക് പോസ്റ്റർ പുറത്തിറങ്ങി. തികച്ചും വ്യത്യസ്തവും കൗതുകമുണർത്തുന്നതുമായ ലുക്കിലാണ് പോസ്റ്റർ അണിയറപ്രവർത്തകർ പുറത്തുവിട്ടിരിക്കുന്നത്.
അഡിഡാസ് (Adidas) ജാക്കറ്റും ഒപ്പം പരമ്പരാഗത ആഭരണങ്ങളും അണിഞ്ഞ് തിളങ്ങുന്ന കണ്ണുകളോടെയുള്ള ഒരു ‘ട്രെൻഡി മുത്തശ്ശിയാണ്’ പോസ്റ്ററിന്റെ പ്രധാന ആകർഷണം. പുതിയ തലമുറയെയും പരമ്പരാഗത ശൈലിയെയും ഒരുപോലെ കോർത്തിണക്കിയുള്ള ഈ വേറിട്ട പോസ്റ്റർ ഇതിനോടകം തന്നെ സോഷ്യൽ മീഡിയയിൽ ശ്രദ്ധ നേടിയിട്ടുണ്ട്.
‘രോമാഞ്ചം’, ‘ആവേശം’ എന്നീ ഹിറ്റ് ചിത്രങ്ങളുടെ സംവിധാന സഹായിയായിരുന്ന ഷിഫിന ബബിൻ പക്കർ രചനയും സംവിധാനവും നിർവ്വഹിക്കുന്ന ചിത്രമാണിത്. അനന്തു എന്റർടെയ്ൻമെൻ്റ്സ്, തിയേറ്റർ ഓഫ് ഡ്രീംസ് എന്നീ ബാനറുകൾ ചേർന്നാണ് ചിത്രം നിർമ്മിക്കുന്നത്. കുഞ്ചാക്കോ ബോബനൊപ്പം ഒട്ടനവധി പുതുമുഖങ്ങളും ചിത്രത്തിൽ അണിനിരക്കുന്നുണ്ട്. ആൽബി ആന്റണി ഛായാഗ്രഹണവും ബിബിൻ അശോക് സംഗീതസംവിധാനവും നിർവ്വഹിക്കുന്ന ചിത്രത്തിന്റെ അണിയറയിൽ മലയാളത്തിലെ പ്രമുഖ സാങ്കേതിക പ്രവർത്തകരാണ് പ്രവർത്തിക്കുന്നത്.