നടന്‍ മോഹന്‍ലാല്‍ ആദ്യമായി സംവിധാനം ചെയ്യുന്ന ചിത്രമാണ് ‘ബറോസ്’. ചിത്രത്തിന്റെ പ്രൊമോ ടീസര്‍ പുറത്തുവിട്ടു. മോഹന്‍ലാല്‍ തന്റെ ഫെയ്‌സ്ബുക്ക് പേജിലൂടെയാണ് ടീസര്‍ പുറത്തുവിട്ടത്. ഒരു ത്രീഡി ഫാന്റസി ഡ്രാമയായി വമ്പന്‍ ബഡ്ജറ്റിലാണ് ഒരുങ്ങുന്നത്.
ചിത്രത്തിന്റെ ആദ്യത്തെ ക്യാരക്ടര്‍ സ്‌കെച്ച് കഴിഞ്ഞ ദിവസം പുറത്തുവിട്ടിരുന്നു. മോഹന്‍ലാലിന്റേയും ഒരു പെണ്‍കുട്ടിയുടെയും കഥാപാത്രങ്ങളുടെ സ്‌കെച്ച് ആണ് സോഷ്യല്‍ മീഡിയയിലൂടെ മോഹന്‍ലാല്‍ പങ്കുവച്ചത്. സേതു ശിവാനന്ദനാണ് പോസ്റ്റര്‍ ഡിസൈന്‍ ചെയ്തിരിക്കുന്നത്. കോവിഡ് രണ്ടാം തരംഗത്തെത്തുടര്‍ന്ന് നിര്‍ത്തിവച്ചിരുന്ന ചിത്രത്തിന്റെ ചിത്രീകരണം ഇന്ന് പുനരാരംഭിക്കുമെന്ന് മോഹന്‍ലാല്‍ അറിയിച്ചിരുന്നു.
ജിജോ പുന്നൂസ് ആണ് തിരക്കഥാകൃത്ത്. ചിത്രത്തില്‍ പൃഥ്വിരാജ് സുകുമാരന്‍, പ്രതാപ് പോത്തന്‍ എന്നിവര്‍ വേഷമിടുന്നുണ്ട്. വിദേശ നടി പാസ് വേഗ ചിത്രത്തിന്റെ ഭാഗമാണ്. ബാറോസ്: ഗാര്‍ഡിയന്‍ ഓഫ് ഡി’ഗാമാസ് ട്രെഷര്‍ എന്ന പേരിലെ നോവല്‍ അടിസ്ഥാനമാക്കിയാണ് ജിജോ പുന്നൂസ് തിരക്കഥയൊരുക്കുന്നത്. ഗോവയും പോര്‍ച്ചുഗലുമാണ് പ്രധാന ലൊക്കേഷനുകള്‍.
നാനൂറു വര്‍ഷം പ്രായമുള്ള ബാറോസ് എന്ന നിധിസൂക്ഷിക്കുന്ന ഭൂതത്തിന്റെ വേഷമാണ് മോഹന്‍ലാല്‍ ചെയ്യുന്നത്. ചിത്രത്തില്‍ മറ്റൊരു പ്രധാന വേഷത്തിലെത്തുന്നത് മായ എന്ന പെണ്‍കുട്ടിയാണ്. സ്‌പെയിന്‍, അമേരിക്ക, ഘാന, പോര്‍ട്ടുഗല്‍ എന്നിവിടങ്ങളില്‍ നിന്നുള്ളവരാണ് ഈ ചിത്രത്തിലെ താരങ്ങളില്‍ കൂടുതല്‍ പേരും. മിന്നല്‍ മുരളിയിലെ സൂപ്പര്‍ വില്ലന്‍ ആയി തകര്‍ത്താടിയ ഗുരു സോമസുന്ദരവും ഈ ചിത്രത്തില്‍ അഭിനയിക്കുന്നുണ്ട്.
കേരളത്തിലും ഗോവയിലുമായി പല ദിവസങ്ങളില്‍ ചിത്രീകരണം നടന്നിരുന്നു. എന്നാല്‍ ചെയ്തത് മുഴുവന്‍ ഉപേക്ഷിക്കേണ്ടി വരുമെന്ന് മരക്കര്‍ അറബിക്കടലിന്റെ സിംഹം എന്ന ചിത്രത്തിന്റെ പ്രമോഷനിടെ മോഹന്‍ലാല്‍ പറയുകയുണ്ടായി. താരനിരയില്‍ ചില മാറ്റങ്ങള്‍ വന്നതിനാല്‍ ആദ്യം മുതലാണ് ചിത്രം ആരംഭിക്കുന്നത്.