അക്രമിക്കപ്പെട്ട നടിക്ക് പിന്തുണയുമായി കൂടുതല്‍ സിനിമാ താരങ്ങള്‍ രംഗത്ത്. ഇന്‍സ്റ്റഗ്രാം സ്റ്റാറ്റസിലൂടെ ഐക്യദാര്‍ഢ്യമറിയിച്ച് മമ്മൂട്ടിയും മോഹന്‍ലാലും രംഗത്തെത്തി. ബഹുമാനം എന്ന ക്യാപ്ഷനോടെയാണ് മോഹന്‍ലാല്‍ നടിയുടെ കുറിപ്പ് പങ്കുവെച്ചത്. നിന്നോടൊപ്പം എന്നാണ് പോസ്റ്റ് പങ്കുവച്ച് മമ്മൂട്ടി കുറിച്ചത്. ദുല്‍ഖര്‍ സല്‍മാനും പോസ്റ്റ് പങ്കുവെച്ചിരുന്നു.
ഇരയാക്കപ്പെടലില്‍ നിന്നും അതിജീവനത്തിലേക്കുള്ള യാത്ര ഒരിക്കലും എളുപ്പമായിരുന്നില്ല എന്ന് പറഞ്ഞുകൊണ്ട് തുടങ്ങുന്ന കുറിപ്പ് ഷെയര്‍ ചെയ്ത് ധൈര്യം എന്ന അടിക്കുറിപ്പോടെയായിരുന്നു പൃഥ്വിരാജ് രംഗത്തെത്തിയത്. ടൊവിനോ തോമസ്,കുഞ്ചാക്കോ ബോബന്‍, ആഷിക്ക് അബു, ബാബുരാജ്, മഞ്ജുവാര്യര്‍, അന്ന ബെന്‍, സുപ്രിയ മേനോന്‍ പൃഥ്വിരാജ്, പൂര്‍ണിമ ഇന്ദ്രജിത്ത്, ആര്യ, സ്മൃതി കിരണ്‍, ഫെമിന ജോര്‍ജ്, ഐശ്വര്യ ലക്ഷ്മി, മൃദുല മുരളി, നിമിഷ സജയന്‍.
ഇരയാക്കപ്പെടലില്‍നിന്ന് അതിജീവനത്തിലേക്കുള്ള യാത്ര എളുപ്പമായിരുന്നില്ലെന്ന് വ്യക്തമാക്കിക്കൊണ്ടാണ് നടിയുടെ കുറിപ്പ് തുടങ്ങുന്നത്. ഇന്നലെ രാവിലെയാണ് നടി പോസ്റ്റുമായി രംഗത്ത് വന്നത്.
‘അഞ്ച് വര്‍ഷമായി എന്റെ പേരും വ്യക്തിത്വവും എനിക്ക് സംഭവിച്ച അക്രമത്തിനടിയില്‍ അടിച്ചമര്‍ത്തപ്പെട്ടിരിക്കുകയാണ്. കുറ്റം ചെയ്തത് ഞാന്‍ അല്ലെങ്കിലും എന്നെ അവഹേളിക്കാനും കുറ്റപ്പെടുത്താനും ഒറ്റപ്പെടുത്താനും ഒരു പാട് ശ്രമങ്ങള്‍ ഉണ്ടായിട്ടുണ്ട്. എന്നാല്‍ അപ്പോഴൊക്കെയും ചിലരൊക്കെ നിശബ്ദത ഭേ?ദിച്ച് മുന്നോട്ട് വന്നു. എനിക്ക് വേണ്ടി സംസാരിക്കാന്‍ എന്റെ ശബ്ദം നിലയ്ക്കാതിരിക്കാന്‍.ഇന്ന് എനിക്ക് വേണ്ടി നിലകൊള്ളുന്ന ഇത്രയും ശബ്ദങ്ങള്‍ കേള്‍ക്കുമ്പോള്‍ തനിച്ചല്ലെന്ന് ഞാന്‍ തിരിച്ചറിയുന്നു. നീതി പുലരാനും തെറ്റ് ചെയ്തവര്‍ ശിക്ഷിക്കപ്പെടാനും ഇങ്ങനെ ഒരു അനുഭവം മറ്റൊരാള്‍ക്കും ഉണ്ടാകാതിരിക്കാനും ഞാന്‍ ഈ യാത്ര തുടര്‍ന്നുകൊണ്ടേ ഇരിക്കും.കൂടെ നില്‍ക്കുന്ന എല്ലാവരുടേയും സ്‌നേഹത്തിന് ഹൃദയംനിറഞ്ഞ നന്ദി’ എന്നായിരുന്നു നടി കുറിച്ചത്.