ജൂണ്‍ എന്ന ചിത്രത്തിന് ശേഷം അഹമ്മദ് ഖബീര്‍ കഥയെഴുതി സംവിധാനം ചെയ്യുന്ന ചിത്രമാണ് ‘മധുരം’. ജോജു ജോര്‍ജ് മുഖ്യ കഥാപാത്രമായെത്തുന്ന ഈ ചിത്രത്തിന്റെ ട്രെയ്‌ലര്‍ പുറത്തിറങ്ങി. മികച്ച പ്രേക്ഷക പ്രതികരണമാണ് ഈ ട്രെയ്‌ലര്‍ നേടിയെടുക്കുന്നത്. വളരെ രസകരവും വൈകാരികവുമായ രംഗങ്ങള്‍ നിറഞ്ഞതാണ് ട്രെയ്‌ലറില്‍ കാണാന്‍ സാധിക്കുന്നത്. പേരുപോലെ തന്നെ മധുരം നിറച്ച ട്രെയ്‌ലറാണിതെന്നാണ് പ്രേക്ഷകര്‍ പറയുന്നത്.
അര്‍ജുന്‍ അശോകന്‍, നിഖിലാ വിമല്‍, ശ്രുതി രാമചന്ദ്രന്‍, ഇന്ദ്രന്‍സ്, ജഗദീഷ്, ലാല്‍, ജാഫര്‍ ഇടുക്കി, നവാസ് വള്ളിക്കുന്ന്, ഫാഹിം സഫര്‍, ബാബു ജോസ്, ജീവന്‍ ബേബി മാത്യു, മാളവിക ശ്രീനാഥ്, ജോര്‍ഡി പാലാ, സുധി മിറാഷ്, തിരുമല രാമചന്ദ്രന്‍, ഐഷ മറിയം എന്നിവരാണ് ഈ ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ഈ ചിത്രം ഒടിടി റിലീസ് ആയി സോണി ലൈവ് വഴി ഡിസംബര്‍ അവസാനം പ്രദര്‍ശനത്തിന് എത്തുന്നുവെന്നാണ് സൂചന.
ജോസഫ്, പൊറിഞ്ചുമറിയം ജോസ്, ചോല എന്നീ ചിത്രങ്ങള്‍ക്ക് ശേഷം അപ്പു പാത്തു പപ്പു ക്രിയേഷന്‍സിന്റെ ബാനറില്‍ ജോജു ജോര്‍ജ്, സിജോ വടക്കന്‍ എന്നിവര്‍ ചേര്‍ന്നാണ് ചിത്രം നിര്‍മിക്കുന്നത്. തിരക്കഥ രചിച്ചിരിക്കുന്നത് ആഷിക് ഐമാര്‍, ഫാഹിം സഫര്‍ എന്നിവര്‍ ചേര്‍ന്നാണ്. വിനായക് ശശികുമാറിന്റെ വരികള്‍ക്ക് ഹിഷാം അബ്ദുള്‍ വഹാബ് ആണ് സംഗീതം നല്‍കിയിരിക്കുന്നത്.
ജിതിന്‍ സ്റ്റാനിസ്ലാസ് കാമറ ചലിപ്പിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് മഹേഷ് ഭുവനേന്ദാണ്. കോ പ്രൊഡ്യൂസേഴ്‌സ് ബാദുഷ, സുരാജ് എന്നിവരാണ്. ഒരു ഹോസ്പിറ്റലില്‍ വെച്ച് പരിചയപ്പെടുന്ന കുറച്ചു സാധാരണക്കാര്‍ തമ്മില്‍ ഉണ്ടാവുന്ന ബന്ധത്തിന്റെ കഥയാണ് ചിത്രത്തില്‍ പറയുന്നത്.