ജൂണ്‍ എന്ന ചിത്രത്തിന് ശേഷം അഹമ്മദ് ഖബീര്‍ കഥയെഴുതി സംവിധാനം ചെയ്യുന്ന ചിത്രമാണ് ‘മധുരം’. ജോജു ജോര്‍ജ് മുഖ്യ കഥാപാത്രമായെത്തുന്ന ഈ ചിത്രത്തിന്റെ രണ്ടാമത്തെ ട്രെയ്ലര് പുറത്തുവിട്ടു. മനസ്സില്‍ പ്രണയം കാത്തു സൂക്ഷിക്കുന്നവര്‍ക്ക് വേണ്ടി അഹമ്മദ് കബീറിന്റെയും അണിയറ പ്രവര്‍ത്തകരുടെയും ക്രിസ്മസ് സമ്മാനമായിരിക്കും മധുരം.
ചിത്രത്തിന്റെ ആദ്യത്തെ ട്രെയ്‌ലറിന് മികച്ച പ്രേക്ഷക പ്രതികരണമായിരുന്നു നേടിയത്. വളരെ രസകരവും വൈകാരികവുമായ രംഗങ്ങള്‍ നിറഞ്ഞതായിരുന്നു ആദ്യം പുറത്തുവിട്ട ട്രെയ്ലറില്‍ കാണാന്‍ സാധിക്കുന്നത്. പേരുപോലെ തന്നെ മധുരം നിറച്ച ട്രെയ്ലറാണിതെന്നായിരുന്നു പ്രേക്ഷകര്‍ പറഞ്ഞത്. സോണി ലീവിലൂടെ ഡിസംബര്‍ 24 ന് ആണ് ചിത്രം റിലീസ് ചെയ്യുന്നത്.
അര്‍ജുന്‍ അശോകന്‍, നിഖിലാ വിമല്‍, ശ്രുതി രാമചന്ദ്രന്‍, ഇന്ദ്രന്‍സ്, ജഗദീഷ്, ലാല്‍, ജാഫര്‍ ഇടുക്കി, നവാസ് വള്ളിക്കുന്ന്, ഫാഹിം സഫര്‍, ബാബു ജോസ്, ജീവന്‍ ബേബി മാത്യു, മാളവിക ശ്രീനാഥ്, ജോര്‍ഡി പാലാ, സുധി മിറാഷ്, തിരുമല രാമചന്ദ്രന്‍, ഐഷ മറിയം എന്നിവരാണ് ഈ ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
ജോസഫ്, പൊറിഞ്ചുമറിയം ജോസ്, ചോല എന്നീ ചിത്രങ്ങള്‍ക്ക് ശേഷം അപ്പു പാത്തു പപ്പു ക്രിയേഷന്‍സിന്റെ ബാനറില്‍ ജോജു ജോര്‍ജ്, സിജോ വടക്കന്‍ എന്നിവര്‍ ചേര്‍ന്നാണ് ചിത്രം നിര്‍മിക്കുന്നത്. തിരക്കഥ രചിച്ചിരിക്കുന്നത് ആഷിക് ഐമാര്‍, ഫാഹിം സഫര്‍ എന്നിവര്‍ ചേര്‍ന്നാണ്. വിനായക് ശശികുമാറിന്റെ വരികള്‍ക്ക് ഹിഷാം അബ്ദുള്‍ വഹാബ് ആണ് സംഗീതം നല്‍കിയിരിക്കുന്നത്. ജിതിന്‍ സ്റ്റാനിസ്ലാസ് കാമറ ചലിപ്പിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് മഹേഷ് ഭുവനേന്ദാണ്.