പേരില്‍ മാറ്റം വരുത്തി മലയാളികളുടെ പ്രിയങ്കരിയായ നടി ലെന. പേരിന്റെ ഇംഗ്ലീഷ് സ്പെല്ലിങ്ങില്‍ ഒരു എ കൂടി ചേര്‍ത്താണ് ലെന പേര് പരിഷ്‌കരിച്ചിരിക്കുന്നത്. ഇന്‍സ്റ്റാഗ്രാമിലൂടെയാണ് താരം ഇക്കാര്യം പങ്കുവെച്ചിരിക്കുന്നത്.
‘എന്റെ പേരിന്റെ സ്പെല്ലിങ് Lenaa എന്നാക്കിയിരിക്കുന്നു. എനിക്ക് ഭാഗ്യം ആശംസിക്കൂ-‘ ലെന കുറിച്ചു. ജൂത സംഖ്യാശാസ്ത്ര പ്രകാരമുള്ള ഉപദേശം സ്വീകരിച്ചാണ് സ്പെല്ലിങ് മാറ്റിയതെന്ന് ലെന വ്യക്തമാക്കി.
സംഖ്യാ ശാസ്ത്രപഠനം അനുസരിച്ച് ഭാഗ്യം വരുന്നതിനായി തങ്ങളുടെ പേരില്‍ പരിഷ്‌കരണങ്ങള്‍ വരുത്തിയിട്ടുള്ള നിരവധി സിനിമാ താരങ്ങളുണ്ട്. മലയാളത്തിനു പുറമെ തമിഴ്, ഹിന്ദി താരങ്ങള്‍ തങ്ങളുടെ പേരുകളില്‍ മാറ്റംവരുത്തിയിട്ടുണ്ട്. ചിലര്‍ ഇംഗ്ലിഷ് സ്‌പെല്ലിങിലാണ് മാറ്റം വരുത്താറുള്ളത്. എന്നാല്‍ ചിലര്‍ പേര് തന്നെ മാറ്റുന്നുമുണ്ട്.
സംവിധായകന്‍ ജോഷി അദ്ദേഹത്തിന്റെ പേരിനൊപ്പം ഒരു y കൂടി കൂട്ടിച്ചേര്‍ത്തിരുന്നു. നടി റോമ തന്റെ ഇംഗ്ലീഷ് പേരില്‍ h എന്ന് ചേര്‍ത്തിരുന്നു. നടന്‍ ദിലീപും പേരില്‍ മാറ്റം വരുത്തിയിരുന്നു. dileep എന്നതിനു പകരം dilieep എന്നാണ് എഴുതിയിരുന്നത്. ഇതില്‍ പുതിയ ആളാണ് ലെന.
മേപ്പടിയാന്‍ ആണ് ലെനയുടെ റിലീസ് ചെയ്ത ഏറ്റവും പുതിയ ചിത്രം, ഉണ്ണി മുകുന്ദന്‍ നായകനായെത്തിയ ഈ ചിത്രത്തിന് വന്‍ സ്വീകരണമാണ്. തിയേറ്ററുകളില്‍ ഇപ്പോഴും പ്രദര്‍ശനം തുടരുകയാണ് മേപ്പടിയാന്‍. ആടുജീവിതം, ഭീഷ്മ പര്‍വം, വനിത, ആര്‍ട്ടിക്കിള്‍ 21 തുടങ്ങി ഒട്ടേറെ സിനിമകളില്‍ ലെന പ്രധാനകഥാപാത്രങ്ങളെ അവതരിപ്പിക്കുന്നു.