ദുല്‍ഖര്‍ സല്‍മാന്‍ നായകനായെത്തുന്ന പുതിയ തമിഴ് ചിത്രമാണ് ഹോയ് സിനാമിക. ബൃന്ദ ഗോപാല്‍ മാസ്റ്റര്‍ സംവിധായികയാകുന്ന ചിത്രം കൂടിയാണിത്. അഭിനയത്തിന് പുറമേ താനൊരു മികച്ച ഗായകന്‍ കൂടിയാണെന്ന് തെളിയിച്ച നടന്‍ കൂടിയാണ് ദുല്‍ഖര്‍. ഇപ്പോഴിതാ ആദ്യമായി തമിഴില്‍ ഗാനം ആലപിച്ചിരിക്കുകയാണ് താരം.
ഹേയ് സിനാമികയിലെ ആദ്യ ഗാനം 14ന് റിലീസ് ചെയ്യുമെന്ന് ദുല്‍ഖര്‍ അറിയിച്ചിരുന്നു. ‘ഭയപ്പെട്ടു ജീവിക്കുന്നത് ഒരു ജീവിതമല്ല, ഇനി ഭയപ്പെടാതെ ജീവിക്കേണ്ട സമയമാണ്’ എന്ന ക്യാപ്ഷനോടെയാണ് ആദ്യ ഗാനം റിലീസ് ചെയ്യുന്ന കാര്യം ദുല്‍ഖര്‍ അറിയിച്ചത്. ഇപ്പോഴിതാ അച്ചമില്ലൈ എന്നു തുടങ്ങുന്ന ഗാനത്തിന്റെ ഷോട്ട് വീഡിയോ താരം പങ്കുവെച്ചിരിക്കുകയാണ്. സംഗീത സംവിധാനം ഗോവിന്ദ് വസന്തയും വരികള്‍ മദന്‍ കര്‍ക്കിയുമാണ്.
ചിത്രത്തിന്റെ ഫസ്റ്റ്ലുക്ക് പുറത്തുവിട്ടപ്പോള്‍ ഗംഭീര സ്വീകരണമായിരുന്നു ലഭിച്ചത്. പല രൂപത്തിലും ഭാവത്തിലുമുള്ള ദുല്‍ഖറിനെ ഫസ്റ്റ് ലുക്ക് പോസ്റ്ററിലൂടെ കാണാം. യാസന്‍ എന്ന കഥാപാത്രമായാണ് ദുല്‍ഖര്‍ എത്തുന്നത്. ചിത്രം 2022 ഫെബ്രുവരി 25ന് തീയറ്ററുകളിലെത്തുമെന്നും ഫസ്റ്റ്ലുക്ക് പോസ്റ്റര്‍ റിലീസ് ചെയ്തപ്പോള്‍ അറിയിച്ചിരുന്നു. ചിത്രത്തില്‍ യാഴാന്‍ എന്ന കഥാപാത്രത്തെയാണ് ദുല്‍ഖര്‍ അവതരിപ്പിക്കുന്നത്.
ചിത്രത്തില്‍ ദുല്‍ഖറിന് നായികമാരായെത്തുന്നത് കാജല്‍ അഗര്‍വാളും, അദിതി റാവു ഹൈദരിയുമാണ്. ചെന്നൈയിലായിരുന്നു സിനിമയുടെ പ്രധാന ലൊക്കേഷന്‍. കൊവിഡ് നിയന്ത്രണങ്ങളില്‍ ഷൂട്ടിംഗ് നിര്‍ത്തിവെച്ചതിനാലാണ് ‘ഹേയ് സിനാമിക’ വൈകിയത്. നേരത്തെ ചിത്രത്തിന്റെ ഷൂട്ടിംങ് സെറ്റില്‍ നിന്നുമുള്ള ചിത്രങ്ങള്‍ സോഷ്യല്‍ മീഡിയകളില്‍ വൈറലായിരുന്നു.
ജിയോ സ്റ്റുഡിയോസ്, ഗ്ലോബല്‍ വണ്‍ സ്റ്റുഡിയോസ്, വൈക്കം18 സ്റ്റുഡിയോസ് എന്നീ ബാനറുകളിലാണ് ചിത്രം നിര്‍മ്മിക്കുന്നത്. ’96’ ലെ സൂപ്പര്‍ഹിറ്റ് ഗാനങ്ങള്‍ക്ക് ഈണം പകര്‍ന്ന ഗോവിന്ദ് വസന്ത് ആണ് ചിത്രത്തിന്റെ സംഗീത സംവിധായകന്‍. മണിരത്‌നം സംവിധാനം ചെയ്ത ഓകെ കണ്‍മണി എന്ന സിനിമയിലെ ഒരു ഗാനത്തില്‍ നിന്നുള്ളതാണ് ഈ ചിത്രത്തിന്റെ പേര്. ഓകെ കണ്‍മണിയിലെ നായകന്‍ ദുല്‍ഖറായിരുന്നു. കഥ, തിരക്കഥ, സംഭാഷണം, വരികള്‍ എന്നിവ ചെയ്യുന്നത് മധന്‍ കാര്‍ക്കിയാണ്.