ദുല്‍ഖര്‍ സല്‍മാന്‍ നായകനായെത്തുന്ന പുതിയ തമിഴ് ചിത്രമാണ് ഹോയ് സിനാമിക. ബൃന്ദ ഗോപാല്‍ മാസ്റ്റര്‍ സംവിധായികയാകുന്ന ചിത്രം കൂടിയാണിത്. ഇപോഴിതാ ‘ഹേയ് സിനാമിക’ ചിത്രത്തിന്റെ ഫസ്റ്റ് ലുക്ക് പോസ്റ്ററും റിലീസ് തിയതിയും അറിയിച്ചിരിക്കുകയാണ്. തമിഴ് നടന്‍ സൂര്യയാണ് പോസ്റ്റ് ചെയ്തത്. ചിത്രം 2022 ഫെബ്രുവരി 25ന് തീയറ്ററുകളിലെത്തും.
‘കാത്തിരിപ്പിന് അവസാനം. സൂപ്പര്‍ കളര്‍ഫുള്‍ ഫസ്റ്റ് ലുക്ക് നിങ്ങള്‍ക്ക് മുന്നില്‍ അവതരിപ്പിക്കുന്നു. ചിത്രം 2022 ഫെബ്രുവരി 25ന് തിയറ്ററുകളിലെത്തും,” എന്ന് ദുല്‍ഖറും പോസ്റ്റര്‍ സോഷ്യല്‍ മീഡിയയില്‍ പങ്കുവെച്ചിട്ടുണ്ട്. പല രൂപത്തിലും ഭാവത്തിലുമുള്ള ദുല്‍ഖറിനെ ഫസ്റ്റ് ലുക്ക് പോസ്റ്ററിലൂടെ കാണാം. യാസന്‍ എന്ന കഥാപാത്രമായാണ് ദുല്‍ഖര്‍ എത്തുന്നത്.
ഹേയ് സിനാമിക’ എന്ന ചിത്രം ഫെബ്രുവരി 25നാണ് റിലീസ് ചെയ്യുന്നത്. ചിത്രത്തില്‍ ദുല്‍ഖറിന് നായികമാരായെത്തുന്നത് കാജല്‍ അഗര്‍വാളും, അദിതി റാവു ഹൈദരിയുമാണ്. ചെന്നൈയിലായിരുന്നു സിനിമയുടെ പ്രധാന ലൊക്കേഷന്‍. കൊവിഡ് നിയന്ത്രണങ്ങളില്‍ ഷൂട്ടിംഗ് നിര്‍ത്തിവെച്ചതിനാലാണ് ‘ഹേയ് സിനാമിക’ വൈകിയത്.
ജിയോ സ്റ്റുഡിയോസ്, ഗ്ലോബല്‍ വണ്‍ സ്റ്റുഡിയോസ്, വൈക്കം18 സ്റ്റുഡിയോസ് എന്നീ ബാനറുകളിലാണ് ചിത്രം നിര്‍മ്മിക്കുന്നത്. ’96’ ലെ സൂപ്പര്‍ഹിറ്റ് ഗാനങ്ങള്‍ക്ക് ഈണം പകര്‍ന്ന ഗോവിന്ദ് വസന്ത് ആണ് ചിത്രത്തിന്റെ സംഗീത സംവിധായകന്‍. മണിരത്‌നം സംവിധാനം ചെയ്ത ഓകെ കണ്‍മണി എന്ന സിനിമയിലെ ഒരു ഗാനത്തില്‍ നിന്നുള്ളതാണ് ഈ ചിത്രത്തിന്റെ പേര്. ഓകെ കണ്‍മണിയിലെ നായകന്‍ ദുല്‍ഖറായിരുന്നു.
നേരത്തെ ചിത്രത്തിന്റെ ഷൂട്ടിംങ് സെറ്റില്‍ നിന്നുമുള്ള ചിത്രങ്ങള്‍ സോഷ്യല്‍ മീഡിയകളില്‍ വൈറലായിരുന്നു. കഥ, തിരക്കഥ, സംഭാഷണം, വരികള്‍ എന്നിവ ചെയ്യുന്നത് മധന്‍ കാര്‍ക്കിയാണ്.