ലൂസിഫറിന് ശേഷം മോഹന്‍ലാലും പൃഥ്വിരാജും ഒന്നിക്കുന്ന ചിത്രമാണ് ‘ബ്രോ ഡാഡി’. ചിത്രത്തിആദ്യ ഗാനം പുറത്തിറങ്ങി. ആശീര്‍വാദ് സിനിമാസിന്റെ മ്യൂസിക് ലേബലില്‍ പുറത്തു വരുന്ന ആദ്യ ഗാനം എന്ന പ്രത്യേകതയും ഇതിനുണ്ട്. ആശീര്‍വാദ് സിനിമാസിന്റെ തന്നെ ഒഫീഷ്യല്‍ യൂട്യൂബ് ചാനല്‍ വഴിയാണ് ഈ ഗാനം റിലീസ് ചെയ്തിരിക്കുന്നത്.
പറയാതെ വന്നെന്‍ എന്ന് തുടങ്ങുന്ന ഗാനം ആലപിച്ചത് എം ജി ശ്രീകുമാര്‍- വിനീത് ശ്രീനിവാസന്‍ ടീം ആണ്. ദീപക് ദേവ് ആണ് ഗാനത്തിന് സംഗീതം പകര്‍ന്നിരിക്കുന്നത്. ലക്ഷ്മി ശ്രീകുമാര്‍ ആണ് ഈ ഗാനത്തിന് വേണ്ടി വരികള്‍ രചിച്ചിരിക്കുന്നത്. മൂന്നു പാട്ടുകള്‍ ആണ് ഈ ചിത്രത്തില്‍ ഉള്ളതെന്ന് ദീപക് ദേവ് കഴിഞ്ഞ ദിവസം വെളിപ്പെടുത്തിയിരുന്നു.
ചിത്രം ജനുവരി 26ന് ഡിസ്‌നി പ്ലസ് ഹോട്ട്സ്റ്റാറിലൂടെ റിലീസ് ചെയ്യും. ട്രെയ്ലറിന് വന്‍ അഭിപ്രായമായിരുന്നു ലഭിച്ചത്. ഒരു വിവാഹ ആലോചനയും അതിനെത്തുടര്‍ന്നുണ്ടാകുന്ന സംഭവ വികാസങ്ങളുമാണ് ബ്രോ ഡാഡിയുടെ പ്രമേയമെന്നാണ് ട്രെയ്‌ലര്‍ നല്‍കുന്ന സൂചന. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മ്മിക്കുന്നത്. കനിഹ, കാവ്യ ഷെട്ടി, ലാലു അലക്‌സ്, മുരളി ഗോപി, സൗബിന്‍ ഷാഹിര്‍ എന്നിവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്.
‘ബ്രോ ഡാഡി’ എന്ന ചിത്രത്തില്‍ മോഹന്‍ലാലിന്റെ കഥാപാത്രത്തിന്റെ ഭാര്യയായും പൃഥ്വിരാജിന്റെ കഥാപാത്രത്തിന്റെ അമ്മയായും മീന ആണ് അഭിനയിക്കുന്നത്. കല്യാണി പ്രിയദര്‍ശന്‍ ചിത്രത്തില്‍ പൃഥ്വിരാജിന്റെ നായികയായും എത്തുന്നു.
ഇതിനോടകം പുറത്തുവിട്ട ചിത്രത്തിന്റെ ടീസറിനും പോസ്റ്ററുകള്‍ക്കുമെല്ലാം വന്‍ സ്വീകരണമാണ് ലഭിച്ചത്. ജോണ്‍ കാറ്റാടി, ഈശോ കാറ്റാടി എന്നീ കഥാപാത്രങ്ങളായി മോഹന്‍ലാല്‍, പൃഥ്വിരാജ് എന്നിവര്‍ അഭിനയിച്ചിരിക്കുന്ന ഈ ചിത്രം ഒരു പക്കാ ഫണ്‍ ഫിലിം ആണെന്ന സൂചനയായിരുന്നു ടീസര്‍ നല്‍കിയത്.