കുഞ്ചാക്കോ ബോബനെ നായകനാക്കി മഹേഷ് നാരായണന്‍ സംവിധാനം ചെയ്യുന്ന പുതിയ ചിത്രമാണ് ‘അറിയിപ്പ്’. ചിത്രത്തിന്റെ പ്രഖ്യാപനം നടത്തിയത് കുഞ്ചാക്കോ ബോബന്‍ ഉള്‍പ്പടെയുള്ളവര്‍ ചേര്‍ന്നാണ്. ഇപ്പോഴിതാ ചിത്രത്തിന്റെ ഷൂട്ടംങ് പുരോഗമിക്കുകയാണെന്ന് അറിയിച്ച് കുഞ്ചാക്കോ ബോബന്‍ ഒരു ചിത്രം പോസ്റ്റ് ചെയ്തിരിക്കുകയാണ്. ഇന്‍സ്റ്റഗ്രാമിലൂടെയാണ് താരം പോസ്റ്റ് പങ്കുവെച്ചിരിക്കുന്നത്.
വേറിട്ട ലുക്കിലാണ് അറിയിപ്പ് ചിത്രത്തില്‍ കുഞ്ചാക്കോ ബോബന്‍ എത്തുന്നത്.
നോയിഡയിലാണ് ചിത്രത്തിന്റെ ഷൂട്ടിംങ് നടക്കുന്നത്. കുഞ്ചാക്കോ ബോബന്റെ കഥാപാത്രത്തെ ക്കുറിച്ചുള്ള കൂടുതല്‍ വിവരങ്ങള്‍ പുറത്തുവിട്ടിട്ടില്ല. ടേക്ക് ഓഫ് എന്ന ചിത്രത്തിലൂടെയാണ് മഹേഷ് നാരായണനും കുഞ്ചാക്കോ ബോബനും ഒന്നിച്ചത്. ഈ ചിത്രം വന്‍ ഹിറ്റായിരുന്നു. അതുകൊണ്ട് തന്നെ ഇവര്‍ വീണ്ടും ഒന്നിക്കുന്നുവെന്ന വാര്‍ത്ത വന്നതോടെ സിനിമാ പ്രേമികള്‍ ഏറെ പ്രതീക്ഷയിലാണ്.
അറിയിപ്പ് എന്ന ചിത്രം നിര്‍മിക്കുന്നത് ഷെബിന്‍ ബക്കറും കുഞ്ചാക്കോ ബോബനും മഹേഷ് നാരായണും ചേര്‍ന്നാണ്. സാനു ജോണ്‍ വര്‍ഗീസാണ് ചിത്രത്തിന്റെ ഛായാഗ്രാഹകന്‍.കുഞ്ചാക്കോ ബോബനുമായി ഒന്നിക്കുന്ന ചിത്രത്തിന്റെ കൂടുതല്‍ വിവരങ്ങള്‍ പുറത്തുവിട്ടിട്ടില്ല.
ഫഹദ് നായകനായി അഭിനയിച്ച ചിത്രമായ ‘മാലിക്’ ആണ് മഹേഷ് നാരായണന്റെ സംവിധാനത്തില്‍ ഏറ്റവും ഒടുവില്‍ പ്രദര്‍ശനത്തിന് എത്തിയത്. ‘സി യു സൂണെ’ന്ന ചിത്രവും മഹേഷ് നാരായണന്‍ സംവിധാനം ചെയ്തിട്ടുണ്ട്. കുഞ്ചാക്കോ ബോബന്‍ നായകനാകുന്ന ചിത്രത്തിന്റെ ചിത്രസംയോജനം നിര്‍വഹിക്കുന്നതും മഹേഷ് നാരായണന്‍ തന്നെയാണ്.