ആന്റണി വര്‍ഗീസിന്റെ കരിയറിലെ ഏറ്റവും മുതല്‍ മുടക്കുള്ള ചിത്രമാണ് ‘അജഗജാന്തരം’. ചിത്രത്തിലെ രണ്ടാമത്തെ ഗാനം പുറത്തുവിട്ടു. പ്രേക്ഷകരടെ റിലീസിന് മുന്നേ ഉത്സവ തിമര്‍പ്പിലേക്ക് എത്തിച്ചുകൊണ്ടുള്ള ഗാനമാണ് ഇത്. ആന്റണി പെപ്പെ, അര്‍ജുന്‍ അശോകന്‍, സാബുമോന്‍ തുടങ്ങി സിനിമയിലെ പ്രധാന കഥാപാത്രങ്ങളെയെല്ലാം വീഡിയോ ഗാനത്തില്‍ കാണാം. ഈ ഗാനം കണ്ടതോടെ ഏറെ പ്രതീക്ഷയോടയാണ് പ്രേക്ഷകര്‍ റിലീസിന് കാത്തിരിക്കുന്നത്. മേളവും വെടിക്കെട്ടും ആനയും ദീപാലങ്കാരവും നിറഞ്ഞ് കളര്‍ഫുള്‍ ആയാണ് ഗാനം ഷൂട്ട് ചെയ്തിരിക്കുന്നത്.
ഉത്സവപ്പറമ്പിലേയ്ക്ക് ഒരു ആനയും പാപ്പാനും ഒപ്പം ഒരു കൂട്ടം യുവാക്കളും എത്തുന്നതും പിന്നീട് 24 മണിക്കൂറിനുള്ളില്‍ അവിടെ സംഭവിക്കുന്ന കാര്യങ്ങളുമാണ് ചിത്രത്തിന്റെ പ്രമേയം. ചെമ്പന്‍ വിനോദ് ജോസ്, അര്‍ജുന്‍ അശോകന്‍, ജാഫര്‍ ഇടുക്കി, സുധി കോപ്പ, രാജേഷ് ശര്‍മ, സാബു മോന്‍, സിനോജ് വര്‍ഗീസ്, ടിറ്റോ വില്‍സണ്‍, ശ്രീരഞ്ജിനി, വിനീത് വിശ്വം, കിച്ചു ടെല്ലസ്, ലുക്മാന്‍, തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
സ്വാതന്ത്ര്യം അര്‍ധരാത്രിയില്‍ എന്ന ചിത്രത്തിനു ശേഷം ടിനു പാപ്പച്ചനും ആന്റണി വര്‍ഗീസും ഒന്നിക്കുന്ന ചിത്രം കൂടിയാണ് ഇത്. യു/എ സര്‍ട്ടിഫിക്കേഷന്‍ ആണ് ചിത്രത്തിന് ലഭിച്ചിരിക്കുന്നത്. 2 മണിക്കൂര്‍ 2 മിനിറ്റ് ആണ് ആകെ ദൈര്‍ഘ്യം. മെയ് 28ന് റിലീസ് പ്രഖ്യാപിച്ചിരുന്ന ചിത്രമാണിത്. എന്നാല്‍ കൊവിഡ് രണ്ടാം തരംഗത്തിന്റെ പശ്ചാത്തലത്തില്‍ തിയറ്ററുകള്‍ അടച്ചതോടെ റിലീസ് നീണ്ടുപോവുകയായിരുന്നു. ഡിസംബര്‍ 23ന് ചിത്രം തിയേറ്ററുകളിലെത്തും.
സില്‍വര്‍ ബേ പ്രൊഡക്ഷന്‍സിന്റെ ബാനറില്‍ എമ്മാനുവല്‍ ജോസഫും അജിത് തലാപ്പിള്ളിയും ചേര്‍ന്നാണ് ചിത്രം നിര്‍മ്മിക്കുന്നത്. ചിത്രത്തിന്റെ തിരക്കഥയൊരുക്കിയിരിക്കുന്നത് കിച്ചു ടെല്ലസ്, വിനീത് വിശ്വം എന്നിവര്‍ ചേര്‍ന്നാണ്. ജിന്റോ ജോര്‍ജാണ് ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത്. സംഗീതം നല്‍കുന്നത് ജസ്റ്റിന്‍ വര്‍ഗീസ് ആണ്.
എഡിറ്റര്‍ ഷമീര്‍ മുഹമ്മദ്, സൗണ്ട് ഡിസൈന്‍ രംഗനാഥ് രവി, ആര്‍ട്ട് ഗോകുല്‍ ദാസ്, വസത്രാലങ്കാരം മഷര്‍ ഹംസ, മേക്കപ്പ് റോണക്‌സ് സേവ്യര്‍, സ്റ്റണ്ട് സുപ്രീം സുന്ദര്‍, ചീഫ് അസോസിയേറ്റ് കണ്ണന്‍ എസ് ഉള്ളൂര്‍, പ്രൊഡക്ഷന്‍ കണ്‍ട്രോളര്‍ ബാദുഷ, പി.ആര്‍.ഒ. മഞ്ജു ഗോപിനാഥ്, മാര്‍ക്കറ്റിംഗ് ഹെയിന്‍സ്.