മലയാള സിനിമയിലെ യുവതാര നിരയില്‍ ആരാധകര്‍ ഏറെയുള്ള പ്രിയ നായികയാണ് മാളവിക മോഹനന്‍. മലയാളത്തിലും തെന്നിന്ത്യന്‍ സിനിമ ലോക്ത്തും ഒരുപോലെ മിന്നിതിളങ്ങുന്ന താരം കൂടിയാണ് മാളവിക. 2013 ല്‍ പുറത്ത് ഇറങ്ങിയ മലയാള ചിത്രം പട്ടം പോലെ എന്ന ചിത്രത്തിലൂടെയാണ് താരം സിനിമാ ലോകത്തേക്ക് അരങ്ങേറ്റം കുറിച്ചത്. പിന്നീട് തമിഴ്,കന്നഡ, ഹിന്ദി ചിത്രങ്ങളില്‍ സജീവമാവുകയായിരുന്നു.
സോഷ്യല്‍ മീഡിയകളില്‍ സജീവമായ താരത്തിന്റെ വിശേഷങ്ങള്‍ അറിയാന്‍ ആരാധകര്‍ക്ക് വളരെ ഇഷ്ടമാണ്. ഇപ്പോഴിതാ താരം ഇന്‍സ്റ്റഗ്രാമില്‍ പങ്കുവെച്ച കുറിപ്പാണ് വൈറലാവുന്നത്. 2021ലെ തന്റെ വ്യക്തി ജീവിതത്തെ കുറിച്ചാണ് താരം കുറിപ്പില്‍ പറയുന്നത്. 2021 ല്‍ സിനിമാ ജീവിതം സന്തോഷം നിറഞ്ഞതും വ്യക്തി ജീവിതം വളരെ മോശവുമായിരുന്നുവെന്ന് താരം പറയുന്നു. കുറച്ച് മാസങ്ങളായി താന്‍ വളരെ ബുദ്ധിമുട്ടുകളിലൂടെ കടന്നു പോവുകയായിരുന്നു. ആ അവസ്ഥയില്‍ നിന്നും തന്നെ അതിജീവിക്കാന്‍ സഹായിച്ചത് കുടുംബാംഗങ്ങളും സുഹൃത്തുക്കളുമാണെന്നും മാളവിക പറയുന്നു.
മാളവികയുടെ വാക്കുകള്‍
ഇത് കഠിനമായ ഒരു വര്‍ഷമായിരുന്നു. ജീവിതത്തില്‍ ഏറ്റവും നല്ലതും രസകരവും തിളങ്ങുന്നതുമായ ഭാഗം മാത്രം ഈ ലോകത്തിന് കാണിക്കാനുള്ള പ്രവണതയാണ് നമുക്ക് എപ്പോഴുമുള്ളത്. കാരണം ആരാണ് മോശം കാര്യങ്ങള്‍ രേഖപ്പെടുത്താനും ഓര്‍മ്മിക്കാനും ആഗ്രഹിക്കുന്നത്, അല്ലേ? പ്രഫഷണല്‍ കാര്യങ്ങള്‍ വളരെ നല്ലതായിരുന്നു. കഴിഞ്ഞ വര്‍ഷത്തെ എന്റെ ആദ്യ റിലീസ് ബോക്‌സ്ഓഫിസിലെ ഏറ്റവും വലിയ ബ്ലോക്ക്ബസ്റ്ററുകളില്‍ ഒന്നായിരുന്നു. ഞങ്ങളുടെ തലമുറയിലെ എന്റെ പ്രിയപ്പെട്ട നടന്‍മാരില്‍ ഒരാളുമായി മറ്റൊരു പ്രൊജക്റ്റില്‍ പ്രവര്‍ത്തിക്കാന്‍ കഴിഞ്ഞു. അദ്ദേഹത്തില്‍ നിന്ന് വളരെയധികം കാര്യങ്ങള്‍ പഠിക്കാന്‍ സാധിച്ചു.
എന്റെ ആദ്യത്തെ ബോളിവുഡ് സിനിമ ആരംഭിച്ചു. ഫെബ്രുവരിയില്‍ ആരംഭിക്കുന്ന മറ്റൊരു ആവേശകരമായ ചിത്രത്തിന് കരാര്‍ ഒപ്പിട്ടു. അങ്ങനെ മനോഹരമായ ഒരുപാട് കാര്യങ്ങള്‍ സംഭവിച്ചു. എന്നാല്‍ വ്യക്തിപരമായി ഞാന്‍ ഒരു നടുക്കടലില്‍പെട്ട അവസ്ഥയിലായിരുന്നു. കുറച്ച് മാസങ്ങളായി ഏറ്റവും ബുദ്ധിമുട്ടേറിയ സാഹചര്യത്തിലൂടെയാണ് കടന്നു പോയത്. ഈ ജീവിതയാത്രയില്‍ എനിക്ക് അനുഭവപ്പെട്ട ഏറ്റവും താഴ്ന്ന അവസ്ഥ. ഈ കരിയര്‍ തന്നെ നിരവധി അനിശ്ചിതത്വങ്ങള്‍ നിറഞ്ഞതാണ്. വ്യക്തി ജീവിതത്തിലും അതിന്റെ അഭാവം ആത്മാവിനെ തകര്‍ക്കും.
ആ സമയത്തെ അതിജീവിക്കാന്‍ എന്നെ സഹായിച്ച ഒരേയൊരു കാര്യം (എന്റെ കുടുംബത്തിന് പുറമെ) നല്ല സുഹൃത്തുക്കളാണ്. ജോലി തിരക്കിലാണെങ്കില്‍, ഒഴിവുസമയം കുടുംബത്തോടൊപ്പം ചെലവഴിക്കുന്നു, പുതിയ ബന്ധത്തിലാണെങ്കില്‍, ആ വ്യക്തിയോടൊപ്പമാണ് മുഴുവന്‍ സമയവും ചെലവഴിക്കുന്നത്. സുഹൃത്തുക്കളെ അവഗണിക്കും, അവരില്‍ ചിലരോട് മാസങ്ങളോളം സംസാരിക്കാറില്ല, കാരണം ജീവിതം വളരെ തിരക്കിലായിരിക്കും.
2021ലെ ഏറ്റവും നല്ല ഭാഗം എന്നെ സംബന്ധിച്ചിടത്തോളം സുഹൃത്തുക്കളാണ്. എന്നെ പോലെ നിങ്ങളും നല്ല സുഹൃത്തുക്കള്‍ക്കൊപ്പം ആവണമെന്ന് ഞാന്‍ ആഗ്രഹിക്കുന്നു. ഒപ്പം ഈ വര്‍ഷം ഇന്‍സ്റ്റഗ്രാമില്‍ നിന്ന് വിഷം നിറഞ്ഞ കാര്യങ്ങള്‍ ഇല്ലാതാക്കാന്‍ തീരുമാനിച്ചു.
