സൗബിന്‍ ഷാഹിര്‍ കേന്ദ്ര കഥാപാത്രത്തെ അവതരിപ്പിക്കുന്ന പുതിയ ചിത്രമാണ് ‘കള്ളന്‍ ഡിസൂസ’. കൊവിഡ് വര്‍ധിക്കുന്ന സാഹചര്യത്തില്‍ പല ചിത്രങ്ങളുടേയും റിലീസ് മാറ്റിവെച്ചിരുന്നു. ഇപ്പോഴിതാ കള്ളന്‍ ഡിസൂസയുടേയും റിലീസ് പ്രഖ്യാപിച്ചിരുന്നതിലും നേരത്തെ ആക്കിയിരിക്കുകയാണ്. ചിത്രം ഈ മാസം 27ന് എത്തുമെന്നാണ് ഡിസംബര്‍ 7ന് അണിയറക്കാര്‍ പ്രഖ്യാപിച്ചത്.
എന്നാല്‍ ഈ വരുന്ന വെള്ളിയാഴ്ച, അതായത് 21ന് ചിത്രം തിയേറ്ററുകളില്‍ എത്തുമെന്നാണ് പുതിയ പ്രഖ്യാപനം. ദുല്‍ഖര്‍ സല്‍മാന്‍ നായകനായെത്തുന്ന സല്യൂട്ട് ടൊവിനോ തോമസ് നായകനായെത്തുന്ന നാരദന്‍ എന്നീ ചിത്രങ്ങളുടെ റിലീസ് മാറ്റിവെച്ചിരുന്നു.
മാര്‍ട്ടിന്‍ പ്രക്കാട്ടിന്റെ സംവിധാനത്തില്‍ ദുല്‍ഖര്‍ സല്‍മാന്‍ നായകനായി 2015ല്‍ പുറത്തെത്തി മികച്ച വിജയം നേടിയ ചിത്രമായിരുന്നു ചാര്‍ലി. ചിത്രത്തല്‍ സൗബിന്‍ അവതരിപ്പിച്ച കഥാപാത്രത്തിന്റെ പേരായിരുന്നു കള്ളന്‍ ഡിസൂസ. ഈ കഥാപാത്രത്തെ നായകനാക്കിക്കൊണ്ടുള്ള സ്പിന്‍ ഓഫ് ചിത്രമാണ് ഇത്.
ജിത്തു കെ ജയന്‍ സംവിധാനം ചെയ്യുന്ന ചിത്രത്തിന്റെ രചന നിര്‍വ്വഹിച്ചിരിക്കുന്നത് സജീര്‍ ബാബയാണ്. ദിലീഷ് പോത്തന്‍, സുരഭി ലക്ഷ്മി, ഹരീഷ് കണാരന്‍ എന്നിവരാണ് ചിത്രത്തിലെ മറ്റ് താരങ്ങള്‍. റാംഷി അഹമ്മദ് പ്രൊഡക്ഷന്‍സിന്റെ ബാനറില്‍ റാംഷി അഹമ്മദ് ആണ് ചിത്രം നിര്‍മ്മിക്കുന്നത്. സാന്ദ്ര തോമസ്, തോമസ് ജോസഫ് പട്ടത്താനം എന്നിവരാണ് ചിത്രത്തിന്റെ സഹനിര്‍മ്മാതാക്കള്‍. ചിത്രത്തിന്റെ ഛായാഗ്രഹണം നിര്‍വഹിക്കുന്നത് അരുണ്‍ ചാലില്‍ ആണ്.
എഡിറ്റിംഗ് – റിസാല്‍ ജയ്നി, പ്രൊഡക്ഷന്‍ കണ്‍ട്രോളര്‍ – ബാദുഷ, കലാസംവിധാനം – ശ്യാം കാര്‍ത്തികേയന്‍, വസ്ത്രാലങ്കാരം – സുനില്‍ റഹ്‌മാന്‍, സംഗീതം- ലിയോ ടോം, പ്രശാന്ത് കര്‍മ്മ, പശ്ചാത്തല സംഗീതം – കൈലാസ് മേനോന്‍, സൗണ്ട് ഡിസൈന്‍ – ശ്രീജിത്ത് ശ്രീനിവാസ്, ചീഫ് അസോസിയേറ്റ് ഡയറക്ടേഴ്സ് – സിലെക്സ് എബ്രഹാം, സനല്‍ വി ദേവന്‍, ഡിസൈന്‍സ് -പാലായ്.